GRUPU DE MOZU XUDÍOS

Content image

 

"LOS DEL ÁTICO"

 

El día 21 d’Adar I del añu 5774 (21 de febreru del añu 2014) aprobóse la puesta en marcha d’un Grupu Mozu venceyáu cola nuesa Kehilá. Esti acontecimientu vieno a enllenar los deseos del pequeñu coleutivu de mozos de la comunidá, que yá llevaben bastante suañando con poder tener un sitiu "de so" dientro de La Casina (llar de la Comunidá Xudía d’Asturies). Un espaciu p’alcontrase y aconceyase, un sitiu onde poder desendolcar iniciatives ya idees empobinaes al crecimientu, al deprendimientu, a l’amistá, a la solidaridá…
Los mozos de la Kehilá tenemos muncho que festexar. Agora tenemos el nuesu requexu nel áticu del edificiu qu’agospia la sinagoga. "El nuesu" áticu ye un cuartu, ampliu, tranquilu y guapu, atarraquitáu de llibros. Tamos convencíos qu’ente les sos muries vamos inspiranos pa poder poner en práutica toles actividaes que queremos desendolcar.
Pel momentu, yá entamamos. Como actu inaugural, decoramos y repartimos, ente la congregación, les huches onde van recaudase los fondos precisos pa plantar árboles n’Israel. Tamién preparamos los recipientes onde recoyer tapones de plásticu, al envís de conseguir ayuda pa los neños enfermos de cáncer, dientro del nuesu proyeutu Tikún. Entá tenemos munches idees más y non poca gana… La xestión del serviciu d’empréstamu de la biblioteca, sesiones de cine alderique, encarganos de tolo tocante al oneg una vez al mes, collaborar cola cocina económica, recoyer alimentos, talleres p’adolescentes empobinaos a ayudar a desaniciar el bullying... y como nun ye too trabayu, facer dalguna qu’otra escapadina cultural.
“Los Del Ático” (Aliat Gag/עליית גג), nome oficial del grupu, tamos abondo ilusionaos y el restu de miembros de la comunidá, que decidieron sofitanos por unanimidá, tamién.
Si quies compartir, deprender, aldericar, si sientes la llamada de la solidaridá y l’amistá... Namás tienes que xubir les escaleres hasta’l final.
¡Has atopanos nel áticu ¡Bienveníu!!